¿Que é o Consello de Comunidades Galegas?

O Consello de Comunidades Galegas, creado pola Lei galega 4/1983, do 15 de xuño, de Recoñecemento da Galeguidade é o órgano representativo das comunidades galegas asentadas fóra de Galicia. Con carácter deliberante e funcións consultivas, o consello asesora á Administración autonómica no cumprimento dos fins establecidos na lei 4/1983.

A súa organización e funcionamento regúlase no Decreto 4/1987, do 8 de xaneiro, polo que se aproba o seu Regulamento, modificado polo Decreto 195/1991 de 30 de maio:

Compoñen o Consello de Comunidades Galegas:

1. Presidente: O presidente da Xunta de Galicia.
2. Vocais: Os conselleiros de Presidencia, Administracións Públicas e Xustiza, Educación e Ordenación Universitaria, Economía e Industria, Traballo e Benestar, Cultura e Turismo e Sanidade.
3. O Secretario Xeral da Emigración.
4. O Secretario Xeral para o Deporte.
5. O Secretario Xeral para o Turismo.
6. Un representante do Consello da Cultura Galega.
7. Un representante da Real Academia Galega.
8. Un representante de cada unha das tres universidades galegas.
9. Un representante por cada unha das comunidades inscritas no Rexistro de Comunidades Galegas.

Pódense incorporar ás sesións do Pleno, con voz pero sen voto, aquelas persoas que o presidente do consello xulgue oportuno que asistan pola súa destacada personalidade ou relevancia nos ámbitos social e cultural de Galicia.

O Pleno reúnese en sesións ordinarias cada tres anos, e a última reunión deste tivo lugar nos días 24 e 25 de agosto de 2006 en Santiago de Compostela.

Son competencias do Pleno do Consello de Comunidades Galegas:

• Deliberar sobre tódolos asuntos contidos na orde do día e, en particular, sobre os informes, estudios e propostas que sexan sometidas ó seu exame e consideración.
• Elixir e nomea-los vocais representantes das áreas xeográficas na Comisión Delegada do Consello.
• Establece-los criterios xerais ós que se terá que suxeita-la actuación da Comisión Delegada durante o período do seu mandato.
• Calquera outra función que lle poida corresponder conforme á Lei galega 4/1983, de recoñecemento da galeguidade, e que estea expresamente atribuída a outros órganos.

A Comisión Delegada funciona como órgano permanente e reúnese anualmente.

Está composta por dezaseis membros: dous polo seu cargo, dous permanentes e doce electos.

• O Presidente da Xunta de Galicia.
• Secretario Xeral da Emigración.

Permantes:

• Un representante do Centro Gallego de Buenos Aires e outro da Casa de Galicia de Montevideo.

Electos:

• Catro vocais representantes dos centros de España inscritos no Rexistro de Comunidades Galegas.
• Catro vocais representantes dos centros do resto de Europa inscritos no Rexistro de Comunidades Galegas.
• Catro vocais representantes dos Centros de América inscritos no Rexistro de Comunidades Galegas.

Durante o período de tempo que dure o seu mandato, a Comisión Delegada reunirase, cando menos, unha vez ao ano e, en todo caso, cando o solicite o seu presidente ou a petición da maioría simple dos seus membros.

É competencia da comisión delegada:

• Preparar as sesións do Pleno, tanto ordinarias como extraordinarias, fixando as ponencias que se deban estudar e discutir nel.
• En xeral, asesorar á Administración Autonómica na execución de accións a favor da Galicia Exterior.

A última reunión tivo lugar os días 30 de outubro e 1 de novembro de 2008 en Lisboa.